ᐋᓪᓗᐃᑦ ᐊᖅᑯᓵᖅᑕᖅᑕᖏᑦ
ᐋᓪᓗᐃᑦ (ᐅᐃᑭᓇᔅ ᐅᐊᑲ) ᑭᒍᑎᓖᑦ ᓴᖅᐱᓖᑦ, ᖃᐅᔨᒪᔭᐅᒻᒥᔪᑦ ᑐᖁᓴᐃᔩᑦ ᓴᖅᐱᓕᖏᑦ ᖃᓪᓗᓈᑐᑦ. ᓇᒥᓕᒫᖅ ᓄᓇᔾᔪᐊᑉ ᑕᕆᐅᖏᓐᓂᒃ ᓇᓂᔭᐅᓲᑦ, ᓇᔪᖅᑕᖃᖅᖢᑎᒃ ᐃᒪᓕᒫᖏᓐᓂᒃ ᐅᖅᑰᓛᑉ ᑕᕆᐅᖏᓂᒃ ᐅᑭᐅᖅᑕᖅᑐᓕᒫᒧᑦ ᓄᖅᑲᖓᔩᑦ ᐊᐅᓪᓛᖅᑎᐅᔪᓪᓗ. ᓇᐸᕈᑎᖃᓐᓂᖏᑦ ᑕᕆᐅᒻᒧᑦ ᓯᑯᖃᓗᐊᖅᑐᒧᑦ ᐃᓗᐊᙱᓕᐅᕈᑎᓲᖅ, ᑭᓯᐊᓂᓕ ᓯᑯᕕᓂᑐᖃᖃᑦᑕᓗᐊᕈᓐᓃᖅᑎᓪᓗᒍ ᐅᑭᐅᖅᑕᖅᑑᑉ ᑕᕆᐅᖓ ᐊᐅᔭᒃᑯᑦ, ᐱᖃᐅᓯᑎᓪᓗᒍ ᑕᓪᓗᕈᑎᐅᑉ ᑕᕆᐅᖓ, ᑕᒪᐃᓐᓄᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᐊᒻᒪᑦᑕᐅᖅ ᐊᐅᓕᖅᑑᑉ ᓯᑯᖃᕈᓐᓃᖅᑎᑦᑎᓕᓐᓂᐊᑕ ᑕᕆᐅᖏᓐᓂᒃ ᐅᐸᒍᑎᔪᓐᓇᑦᑎᐊᓕᖅᖢᑎᒃ. ᐅᓇ ᓄᓇᙳᐊᖅ ᖃᓕᕇᓕᖅᓯᒪᔾᔪᑎᖓ ᑕᑯᔅᓴᐅᑎᑦᑎᔪᖅ ᐋᓪᓗᐃᑦ ᓇᐅᒃᑯᑦ ᐊᑐᖅᑕᖃᓲᖑᒻᒪᖔᖏᑕ ᑕᕆᐅᖓᓂᒃ ᒪᓕᒃᖢᒍ ᐃᓄᐃᑦ ᖃᐅᔨᒪᔭᑐᖃᖏᑕ ᓄᓇᓖᓪᓗ ᓇᔪᖅᑐᓄᑦ ᖃᐅᔨᒪᓂᕆᔭᐅᔪᓄᑦ ᐃᖃᓗᒐᓱᕝᕕᐅᓲᑦ ᑲᑎᖅᓱᒐᐅᔪᑦ ᐃᒪᒻᒥᐅᑕᓕᕆᔨᒃᑯᓐᓄᑦ ᑲᓇᑕᒥ.