ᑕᓪᓗᕈᑎᐅᑉ ᑕᕆᐅᖓ ᐃᓄᖏᓐᓄᑦ ᑕᐃᒍᖅᑕᐅᓂᖓ, ᐊᔾᔨᖃᕋᓂ ᐅᑭᐅᖅᑕᖅᑐᒥ ᐆᒻᒪᔪᖏᑕ ᐊᐅᓚᓂᖃᓐᓂᐊᒍᑦ ᓄᓇᔾᔪᐊᓕᒫᒥ ᖃᐅᔨᒪᔭᐅᓂᓕᒃ ᐊᔾᔨᒌᖏᑦᑑᑎᓂᒃ ᓂᔾᔪᑎᖃᓐᓂᐊᓄᑦ ᐊᒥᓲᔪᓂᓪᓗ ᑕᕆᐅᒻᒥᐅᑕᖃᐅᖅᖢᓂ. ᓇᓄᐃᑦ, ᕿᓚᓗᒐᑦ, ᖃᐅᓪᓗᖅᑖᑦ, ᐊᕝᕖᑦ, ᐊᐃᕖᑦ, ᓇᑦᑏᑦ ᑕᕆᐅᓪᓗ ᑎᖕᒥᐊᖏᑦ ᑕᒪᐃᓐᓂᒃ ᓇᔪᓲᑦ ᑕᕆᐅᖓᓂᒃ ᑕᓪᓗᕈᑎᐅᑉ. ᑐᙵᕕᓪᓚᕆᐅᓪᓗᓂ ᓇᔪᖅᑕᐅᔪᖅ ᐳᐃᔨᓄᑦ ᐃᖃᓗᖏᓄᓪᓗ, ᑕᓪᓗᕈᑎᐅᑉ ᑕᕆᐅᖓ ᐊᑑᑎᖃᓪᓚᕆᒃᑭᕗᖅ ᓂᕿᒧᑦ ᑐᙵᕕᒋᔭᐅᓪᓗᓂ ᐃᓄᖏᓐᓄᑦ ᓄᓇᓕᓐᓂ ᓇᔪᖅᑐᑦ, ᒥᑦᑎᒪᑕᓕᒃ ᐃᑉᐱᐊᔾᔪᓪᓗ. ᑕᐃᒪᓕ ᓄᓇᓖᑦ ᒐᕙᒪᖏᓪᓗ ᐅᖃᐅᓯᖃᑯᑖᔅᓯᒪᓕᖅᑑᒐᓗᐊᑦ ᐊᕐᕌᒍᑦ 30 ᐅᖓᑖᓄᑦ, ᐅᓪᓗᒥ ᓱᓕ ᑕᕆᐅᖓ ᓴᐳᒻᒥᔭᐅᓂᖃᖏᑦᑐᖅ.

ᑕᓪᓗᕈᑎᐅᑉ ᑕᕆᐅᖓ ᐊᑯᓐᓂᖅᓱᖅᑐᖅ ᕿᑭᖅᑖᓘᑉ ᕿᑭᖅᑕᖓᑕ ᑕᓪᓗᕈᑎᐅᓪᓗ ᕿᑭᖅᑕᖓᑕ ᑭᒡᒐᖅᑐᐃᔪᖅ ᐅᖅᑯᖓᑕ ᐃᓱᖅᐸᓯᐊᓂᒃ ᑭᖑᓪᓕᖅᐹᑉ ᓯᑯᖃᐃᓐᓇᖅᑐᖅ ᐃᓂᖓᓂ - ᐅᑭᐅᖅᑕᖅᑐᒥ ᐃᓂᒋᔭᐅᔪᑑᓂᐊᕋᓱᒋᔭᖅ ᖃᓪᓗᓈᓄᑦ ᐊᐅᔭᒃᑯᑦ ᓯᑯᖃᐃᓐᓇᖃᑦᑕᓪᓗᓂ ᐅᖅᑰᓯᕙᓪᓕᐊᑎᓪᓗᒍ ᐊᕐᕌᒍᖓ ᑎᑭᓪᓗᒍ 2050. ᐊᒡᒋᖅᑐᓂ ᐊᕐᕌᒍᓂ, ᓂᕆᐅᒋᔭᐅᔪᑦ ᐊᒃᑐᐃᓂᖃᓐᓃᑦ ᓯᓚᐅᑉ ᐃᓕᖅᑯᓯᑐᖃᒥᓂᒃ ᐊᑐᕈᓐᓃᓐᓂᐊ ᑕᑯᔅᓴᕈᖅᐸᓪᓕᐊᓕᖅᑎᓪᓗᒍ, ᑖᓐᓇ ᑭᖑᓪᓕᖅᐹᑉ ᓯᑯᖃᐃᓐᓇᖅᑐᖅ ᐃᓂᖓ ᑕᓪᓗᕈᑎᐅᓪᓗ ᑕᕆᐅᖓ ᑐᙵᕕᓪᓚᕆᐅᓕᓐᓂᐊᖅᑐᑦ ᓇᔪᖅᑕᐅᔪᓐᓇᓪᓗᑎᒃ ᓯᑯᒧᑦ ᓇᔪᓲᓄᑦ ᓂᔾᔪᑎᓄᑦ ᐃᓄᓐᓄᓪᓗ ᓯᑯᒦᒐᔪᒃᑐᓄᑦ.

ᐅᑭᐅᖅᑕᖅᑐᒥ ᐱᓕᕆᓂᖏᑦ WWF-ᑯᑦ

WWF-ᑯᑦ ᐅᑭᐅᖅᑕᖅᑐᒥ ᐱᓕᕆᓯᒪᓕᖅᑐᑦ ᐊᕐᕌᒍᑦ 40 ᐅᖓᑖᓄᑦ, ᐃᑲᔪᐃᓪᓗᑎᒃ ᐊᑐᓛᓂᒃ ᖃᐅᔨᓴᐃᓂᐅᔪᓂᒃ, ᐱᑕᖃᖅᑎᑦᑎᓪᓗᑎᒃ ᓄᓇᒃᑯᑦ ᐃᑲᔪᐃᔾᔪᑎᓂᒃ ᓂᔾᔪᑎᑦ ᒥᐊᓂᕆᔭᐅᓂᖏᓄᑦ ᐱᒋᐊᖅᑎᑕᐅᔪᓄᑦ, ᑲᑐᔾᔨᖃᑎᖃᖅᖢᑎᒃ ᓄᓇᓕᐅᔪᓂᒃ. WWF-ᑯᑦ ᐱᓕᕆᖃᑎᖃᖅᑐᑦ ᑕᒪᒃᑯᐊ ᐊᑐᓛᖑᔪᑦ ᐅᑭᐅᖅᑕᖅᑐᒥ ᓇᔪᖅᑕᐅᓲᑦ ᓴᐳᒻᒥᔭᐅᖁᓪᓗᒋᑦ ᐊᑐᓛᓄᑦ ᓂᔾᔪᑎᓄᑦ ᐃᓄᖏᓪᓗ ᓂᕿᖃᖅᑏᑦ ᑕᒪᒃᑯᓂᖓ. ᐅᐊᓕᓂᐅᑉ ᑕᕆᐅᖓᓂᒃ ᕿᑭᖅᑖᓘᑉ ᐃᒪᕕᐊᓄᑦ, WWF ᑲᓇᑕᒥ ᓄᓇᓕᓐᓂᒃ ᐱᓕᕆᖃᑎᖃᖅᑐᑦ ᐆᒪᔪᖃᕝᕕᓪᓚᕆᐅᔪᑦ ᓇᔪᖅᑕᐅᓲᑦ ᓴᐳᒻᒥᔭᐅᑎᓐᓇᓱᒃᖢᑎᒍᑦ - ᐆᒪᔪᑦ ᓇᔪᖅᑕᖏᓪᓗ ᓴᐳᒻᒥᓇᓱᒃᖢᒋᑦ ᐃᓄᖏᑕ ᐊᓐᓂᕆᔭᖏᑦ. ᐃᓚᖏᒍᑦ, ᑕᒪᓐᓇ ᐃᓚᓕᒃ ᓇᓗᓇᐃᖅᓯᓂᒻᒥᒃ ᓇᓪᓕᐊᒃ ᓇᔪᖅᑕᐅᔪᑦ ᐃᑉᐱᓐᓂᖅᓯᒪᓗᐊᓕᓐᓂᖏᑦ ᐊᑐᓗᐊᓐᓂᖏᓪᓘᓐᓃᑦ ᓴᓇᕝᕕᐅᖁᔭᐅᖏᑦᑐᑦ ᐅᖅᓱᐊᓗᓐᓂᐊᖅᑎᓄᑦ ᐊᓯᖏᓄᓪᓗ.